तपेन्द्र कुवर : नेपाल कम्युनिष्ट पार्टी (एकीकृत समाजवादी) अछामको दोस्रो जिल्ला कमिटीको विस्तारित बैठक मंगलसैनमा सम्पन्न भएको छ । जिल्ला कमिटी अध्यक्ष हिरण्ड भट्टराईको अध्यक्षतामा भएको बैठकका प्रमुख अतिथि नेपाल कम्युनिष्ट पार्टी (एकीकृत समाजवादी) का केन्द्रीय सदस्य सुदुरपश्चिम् प्रदेश कमिटी उपाध्यक्ष शेरबहादुर कुँवर रहनु भएको थियो ।
बैठकलाई सम्बोधन गर्दै केन्द्रीय सदस्य कुँवरले नेकपा एमाले भनेको इतिहास भएको भन्दै अहिले नेकपा एमालेका अध्यक्ष केपी शर्मा ओलीको नेतृत्वमा रहेको पार्टी दक्षिणपन्थी अवसरवादको गुट भएको दाबी गर्नुभयो । उहाँले नयाँ गुटले अहिले पनि देशभर नेकपा एमाले हौँ भनेर भ्रम छर्ने काम गरेको पनि बताउनु भयो ।
उहाँले नेकपा एमालेमा रहेका नेता तथा कार्यकर्तालाई जनताको साथ दिइरहेको पार्टी नेकपा एकीकृत समाजवादीमा आउन पनि आग्रह गर्नुभयो । बैठकलाई सम्बोधन गर्दै केन्द्रिय सदस्य अछाम ईन्चार्ज कुलबहादुर कुँवरले आगामी स्थानीय तहको निर्वाचनमा जुट्नको लागि नेता कार्यकर्तालाई आग्रह गर्नुभयो ।समाजवादी पार्टीले लिएको नीति र कार्यक्रमलाई जनतामाझ लिनु पर्नेमा जोड दिनुभयो ।
बैठकले आगमी स्थानीय तहको निर्वाचन केन्द्रित कार्यक्रम बनाएको छ। चैत २८ गतेसम्म पालिका बैठक घरदैलो कार्यक्रम गर्ने निर्णय गरेको छ। स्थानीय तहको निर्वाचनलाई सफल र व्यवस्थापन र तालमेल गर्नको लागि केन्द्रिय सदस्य अछाम ईन्चार्ज कुलबहादुर कुँवरको नेतृत्वमा तीन सदस्यीय समिति बनएको छ । समितिको सदस्यमा केन्द्रिय सदस्य शंकर भण्डारी, जिल्ला कमिटी अध्यक्ष हिरण्ड भट्टराई रहनुभएको छ ।
यस्तै जिल्ला कमिटी अध्यक्ष हिरण्ड भट्टराईको अध्यक्षतामा ७ सदस्यीय घोषणा पत्र लेखन समिति बनाएको छ । बैठकमा १० वटै पालिकाका ईन्चार्ज, सहइन्चार्ज र अध्यक्षले रिपोर्टिङ गरेका थिए ।
बैठकमा केन्द्रिय सदस्य शंकर भण्डारी, प्रदेश कमिटी सदस्य शिबबहादुर कुवर शिलोज, जितबहादुर निशानी,डम्मर नेपाली, लक्ष्मी भट्टराई, कल्लान सिंह बोगटी, प्रथिबी भण्डारी लगायतको सहभागिता रहेको थियो ।