चक्र प्रसाद जैसी, मंगलसेन – अछामको प्रसिद्ध डौठेगडा मेला आज लागीरहेको छ । बान्नीगढी जयगढ गाउँपालिका वडा नम्बर १ स्थित गाज्रामा हरेक वर्ष कार्तिक शुक्ल पूर्णीमाका दिन लाग्ने डौठेगडा मेला यसवर्ष पनि भव्य रुपमा लागिरहेको हो ।
मेलामा पुजाआजा सहित स्थानिय डेउडा, न्याऊले खेल लगाएर कार्तिक शुक्ल पूर्णीमाको रातभर रमाईलो गर्ने चलन छ । पुर्णीमाको भोलिपल्ट विहानसम्म पनि खेल लाग्ने गरेको छ । यसैबिच यसवर्ष मेलाको भोलपल्ट ‘हुड्केली’ नाच सहित देउडा खेल हुने भएको छ । स्थानीय संस्कृति लोप हुदै गरेकोले संरक्षणमा टेवा पुगोस् भनेर हुड्के नाच सहित देउडा खेल हुने डौठेगडा मेला ब्यवस्थापन समिति अध्यक्ष भरत बहादुर खड्काले जानकारी दिनुभयो ।
मेलाको भोलिपल्ट बिगतमा ‘हुड्केली’ नाच देखाईदै आएकोमा हुड्के अभावमा नाच रोकिएको थियोे । यसपटक अछामी हुड्के हंस परियारले ‘हुड्केली’ नाच देखाउने मेला ब्यवस्थापन समितिले जनाएको छ ।
