धनगढीः सुदूरपश्चिम प्रदेश सरकारका सामाजिक विकासमन्त्री झपटबहादुर साउँदले शिक्षा र स्वास्थ्य क्षेत्रमा केही गरेरै देखाउँने बताएका छन् । मन्त्री साउँदले शिक्षा र स्वास्थ्य आधारभूत सेवा भएकाले प्रदेशवासीले फरक अनुभूति गर्ने हिसावले काम गर्ने बताएका हुन् ।
जेठ ६ गते प्रदेशको सामाजिक विकासमन्त्रीमा नियुक्त भएका नेकपा माओवादी केन्द्रबाट अछाम निर्वाचन क्षेत्र नम्बर १ को (२) बाट निर्वाचित मन्त्री साउँदले शिक्षा र स्वास्थ्यमा प्रदेश सरकारले गर्न सक्छ भन्ने हिसावले काम गर्ने बताए ।
शनिवार मन्त्री निवासमा सञ्चारकर्मीसँग कुरा गर्दै मन्त्री साउँदले मन्त्रालयको बजेट यसपालि कनिका छरेजस्तो नआउने बताए । उनले नीतिगत सुधारका क्षेत्रमा निर्भिक भएर काम गर्ने बताउँदै मन्त्रालयले गर्नुपर्ने नीतिगत सुधारको विषयमा आवश्यक सुझाव लिएर काम गर्ने बताए ।
सेती अस्पतालाई दुई सय शय्याको बनाउने
सामाजिक विकासमन्त्री साउँदले सेती प्रादेशिक अस्पताललाई दुई सय शय्यामा स्तरोन्नति गर्ने उनले बताए । सेती प्रदेशकै रेफरल अस्पताल भएकाले जनतालाई सहज उपचार सेवा दिन अस्पताललाई दुई सय शय्याको बनाएर सञ्चालनमा ल्याउने बताए। स्वास्थ्य सेवाको पहुँच विस्तार र अस्पतालहरूको क्षमता बढाउन नीतिगत व्यवस्था गर्ने मन्त्री साउँद बताए ।
स्वास्थ्यकर्मीलाई सतप्रतिशत भत्ता दिइने
सेती प्रादेशिक अस्पतालको सेवाबारे जनताबाट धेरै गुनासो आउँने भएकाले अस्पतालको क्षमता र गुणस्तर बढाउने स्पष्ट योजना र कार्यक्रम बनाएर काम गर्ने सोचाइ बनाएको मन्त्री साउँदले बताए । सुदूरपश्चिममा विशेषज्ञ चिकित्सक नबस्ने कारणको खोजी गरेर सेवा सुविधा सत्प्रतिशत बढाएर भए पनि अस्पतालमा चिकित्सक काम गर्न आउने वातावरण तयार गरिने उनको भनाई छ । सेतीमा भवन निर्माण, उपकरण र जनशक्ति व्यवस्थापन गरी सर्वसाधारणले विशेषज्ञ स्वास्थ्य सेवा सहजै पाउने अवस्था निर्माण गर्न प्रतिवद्ध भएर काम गर्ने मन्त्री साउँदको दाबी छ ।
नमूना विद्यालय भवनको योजना ल्याउने
गएको पाँच वर्षमा प्रदेश सरकारले दुई कोठे र चार कोठे भवनमा बजेट हालेको भए पनि यो वर्षबाट नमूना विद्यालय भवन निर्माण गर्न बजेट विनियोज गर्ने सोच मन्त्रालयको छ । दुई कोठे र चार कोठे विद्यालय भवन पहुँचका भरमा वितरण गरिएका र नतिजा पनि राम्रो नदेखिएकाले यो वर्षबाट विद्यालय भवनमा विगतको जस्तो गल्ति नदोहरिने मन्त्री साउँदको दाबी छ । उनले यो वर्ष मन्त्रालयमा बजेटको सिलिङ घटेर आए पनि परिणाम दिने क्षेत्रमा बजेट हाल्ने र अनावश्यक शिर्षक र क्षेत्रमा बजेट नहाल्ने बताए ।
सुधारको सुरुवात सेती अस्पतालबाटै गरिने
प्रदेशको स्वास्थ्य सेवाको सुधार गरेर देखाउने मन्त्री साउँदको दाबी छ । जनताले उपचार नपाएर भोग्नुपर्ने सास्ती कम गर्ने उद्देश्यका साथ काम गर्ने उनले बताए । प्रदेश सरकारले स्वास्थ्य र शिक्षाको पहुँच र गुणस्तर वृद्धि गर्न जनताको मर्का र चाहना बुझेर काम गर्नेमा जोड दिएका छन् ।
-dineshkhabar
