टेक राज भण्डारी, भदाै ६, अछाम
किशोरी तथा युवतीहरुका लागि सुरक्षित एवं सहयोगी वातावरण सेफ गर्लस् परियोजना अन्तर्गत मंगलसेन नगरपालिकाका शिक्षकहरुको समीक्षा बैठक सकिएकाे छ । कोरिया अन्तर्राष्ट्रिय सहयोग संस्था (KOICA), युएनएफपीए तथा गुड नेवर्स इन्टरनेशनल नेपालको सहयोग र सहकार्यमा WAC नेपालद्वारा सञ्चालित सेफ गर्लस् परियोजना अन्तरगत शिक्षकहरुका वीच भए गरेका गतिविधिकाे समीक्षा गरिएको हाे ।
मंगलसेन नगरपालिकाका माध्यमिक विद्यालयका वृहत्तर याैनिकता शिक्षा (CSE) तालिम प्राप्त शिक्षकहरुकाे बैठकमा विद्यालयमा याैन तथा प्रजनन स्वास्थ्य सम्बन्धि विद्यालय तथा समुदायमा गरिरहेका क्रियाकलापकाे बारेमा जानकारी गराईएकाे थियाे । साथै शिक्षकले विद्यालयमा गर्न सकिने गतिविधिबारे कार्ययोजना समेत तयार पारेका छन् । आगामी दिनमा विद्यालय तथा समुदाय स्तरमा जनचेतना जगाउनका लागि गर्न सकिने क्रियाकलाप समेटेर कार्ययोजना निर्माण गरिएको हाे ।
बैठकमा षाेडशादेवि माविका प्रधानाध्यापक सर्पराज रिमाल प्रमुख अतिथि रहनुभएकाे थियाे । बैठकमा CSE फाेकल शिक्षक शंकर रावलले वृहत्तर याैनिकता शिक्षा, हालकाे अवस्था र आगामी दिनमा गर्नुपर्ने कार्यका बारेमा सहजीकरण गर्नुभएको थियाे ।
बैठकमा मंगलसेन नगरपालिकाका ११ वटा माध्यमिक विद्यालयका नयाँ र गत बर्ष तालिम लिनुभएका फाेकल शिक्षकहरुकाे सहभागिता रहेकाे थियाे ।
परियाेजना मार्फत भएका र आगामी याेजनाका बारेमा सेफ गर्लस् परियाेजनका कमलबजार परियोजना अधिकृत दीपा बम र मंगलसेन परियोजना अधिकृत गाैरी भण्डारीले जानकारी गराउनु भएको थियाे ।