२७ औं राष्ट्रिय भुकम्प सुरक्षा दिवस अछाममा पनि मनाईयाे

२७ औं राष्ट्रिय भूकम्प सुरक्षा दिवसको अवसरमा बुधबार अछाम जिल्लामा विभिन्न कार्यक्रमहरु सम्पन्न भएका छन् । जिल्लाका दशवटै स्थानिय तहमा भूकम्पसम्बन्धी विविध सचेतनामूलक कार्यक्रम गरिएको हो ।

जिल्ला बिपद् व्यवस्थापन समिति, अछामको आयोजनामा मंगलसेनमा भएको कार्यक्रममा भुकम्प सम्बन्धि कृतिम अभ्यास तथा देउडा खेल खेलेर सन्देश मुलक कार्यक्रम गरिएको अछामका प्रमुख जिल्ला अधिकारी शिवप्रसाद लम्सालले जानकारी दिनुभयो । उहाँका उनुसार जिल्ला प्रशासन कार्यालय, मंगलसेन नगरपालिका, सामाजिक विकास कार्यालय, गोरख बक्स गण र नेपाल प्रहरी सँगको साँझेदारीमा मंगलसेन दरबार परिसरमा कार्यक्रम गरिएको हो । विभिन्न विकास साझेदार संस्थाहरुको सहयोगमा गरिएको उक्त कार्यक्रममा भुकम्प आउँदा अपनाउनु पर्ने सावधानी बारे विभिन्न चेतनामुलक सन्देश दिने खालका गतिविधि प्रदर्शन गरिएको थियो । प्रमुख जिल्ला अधिकारी लम्सालका अनुसार सदरमुकाम सहित अन्य स्थानिय तहहरुमा पनि भूकम्प सुरक्षा दिवसको अवसरमा विभिन्न कार्यक्रमहरु गरिएका छन् ।

साँफेबगर नगरपालिका, कमलबजार नगरपालिका, पञ्चदेवल बिनायक नगरपालिका, ढकारी, तुर्माखाँद, चौरपाटी, मेल्लेख, बान्नीगढी जयगढ र रामारोशन गाउँपालिकाले पनि दिवसका अवसरमा विभिन्न कार्यक्रमहरु गरेका हुन् ।

दिवसको अवसरमा चेतना विस्तार गर्नेगरी कतै हाजिरी जवाफ प्रतियोगिता, कतै गोष्ठि तथा छलफल र केहि पालिकाले भुकम्प बाट बच्ने उपायका बारेमा कार्यक्रमहरु गरेका छन ।