मंगलसेन ३ कुटीमा ११ दिवसिय शिव महापुराण ज्ञान महायज्ञ सम्पन्नः शिवालय क्षेत्रको विकासका लागि सहयोग गर्ने नगरप्रमुख बोहराको भनाई

होम साउद, अछाम २९ बैशाखः

मंगलसेन ३ कुटीमा यहि बैशाख १९ गतेबाट सञ्चालन गरिएको ११ दिवसिय शिव महापुराण ज्ञान महायज्ञ सम्पन्न भएको छ । महायज्ञको एक समारोहका विच मंगलसेन नगरपालिका प्रमुख पदम बहादुर बोहराको प्रमुख आतिथ्यतामा समापन गरिएको हो ।

प्रमुख कथाबाचक पण्डीत मदनराज उपाध्यायले ११ दिनसम्म पुराण बाचन गर्नुभएको महायज्ञमा विभिन्न व्यक्तिहरुले नगद दान तथा संरचना निर्माणको घोषणा समेत गरेका छन । जसमा महायज्ञ अवधिभर कुल  १५ लाख ३० हजार ७६ रुपैयाँ दान संकलन भएको तथा कुल ११ लाख २६ हजार अनुमानित खर्चको विवरण समेत सार्वजनिक गरिएको थियो । यस्तै महायज्ञबाट नर्मदेश्वर शिवालय परिसरमा भैरब मन्दिर निर्माण र नन्दि स्थापनाका लागि दान दाताहरुबाटै कार्य प्रारम्भ गरिएको छ भने होम कुण्ड र गेट निर्माण कार्य सम्पन्न भईसकेको छ । साथै शिवालय क्षेत्रको विकासका लागि मंगलसेन नगरपालिका सहित वडानम्वर ३ र ५ सहित विभिन्न सरकारी कार्यालयहरुबाट आवश्यक सहयोग गर्ने प्रतिवद्धता व्यक्त गरिएको छ ।

महायज्ञ मुल आयोजक समिति संयोजक तथा शिवालय क्षेत्र विकास समितिका अध्यक्ष तेज बहादुर बिष्टको अध्यक्षतामा भएको समापन समारोहमा मंगलसेन नगरपालिका प्रमुख पदम बहादुर बोहराको प्रमुख अतिथि रहनुभएको थियो । कार्यक्रममा बोल्दै नगर प्रमुख बोहराले शिवालय क्षेत्रको विकासका लागि जस्तोसुकै सहयोग गर्न पनि तयार रहेको बताउनुभयो । धार्मीक आस्था र धरोहरको रुपमा रहेको नर्मदेश्वर शिवालय निकै ऐतिहासिक स्थल भएकोले यसको उचित संरक्षण र विकास संगै प्रचारप्रसार गर्दै लैजानुपर्ने बताउनुभयो । ११ दिनसम्म सञ्चालित महायज्ञबाट सिकेको ज्ञानलाई दैनीक व्यावहारिक जीवनमा लागु गर्न सकेमा जीवनमा सफलता मिल्ने उहाँको भनाई छ ।

समापन समारोहमा मंगलसेन नगरपालिका उपप्रमुख संगिता कुमारी रावल र अछामका प्रमुख जिल्ला अधिकारी आनन्द सारु बिशिष्ट अतिथि रहनुभएको थियो । यस्तै कार्यक्रममा सवै राजनीतिक दलहरुको तर्फबाट नेपाली काँग्रेसका जिल्ला उपसभापति नयाँराम बजगाई र सवै वडा अध्यक्षहरुको तर्फबाट वडानम्वर ३ का अध्यक्ष बिर्ख बहादुर बोगटीले मन्तव्य राख्नुभएको थियो । कार्यक्रममा दान दाताहरुलाई सम्मान गरिनुका साथै प्रमाणपत्र वितरण गरिएको थियो भने शिवालय क्षेत्रमा संरचना निर्माणको घोषणा गर्ने प्रमुख दाताहरुलाई विशेष सम्मान गरिएको थियो । यस्तै प्रमुख बाचक, कलाकार टिम, संकल्प कर्ता, सञ्चार माध्ययम र कार्यक्रम व्यवस्थापन टिमलाई समेत सम्मानित गरिएको थियो ।

महायज्ञ मुल आयोजक समिति सदस्य पदम सिंह भाटले स्वागत मन्तव्य राख्नुभएको समापन समारोहमा आर्थिक उपसमिति संयोजक बृकेश सिंह बोगटीले प्रारम्भिक प्रतिवेदन तथा आय व्ययको विवरण सार्वजनिक गर्नुभएको थियो । कार्यक्रमको सञ्चालन मुल आयोजक समितिका सचिव कर्ण बहादुर धामी र सदस्य होम बहादुर साउदले गर्नुभएको थियो ।

महायज्ञको प्रारम्भिक प्रतिवेदन अनुसार १५ लाख ३० हजार ७६ रुपैयाँ दान संकलन भएकोमा ११ लाख २६ हजार खर्चको अनुमान गरिएको छ भने ४ लाख ४ हजार ७६ रुपैयाँ बचत हुने अनुमान गरिएको छ । नरमदेश्वर शिवालय क्षेत्रमा नन्दी स्थापना, भैरव मन्दिर निर्माण, अन्य भौतिक संरचना निर्माण र धार्मीक तथा पर्यटकीय विकास संगै नर्मदेश्वर शिवालय क्षेत्रलाई धामको रुपमा विकास गर्ने उदेश्यले सञ्चालित शिवपुराण महायज्ञ निकै व्यवस्थित र सफलतापूर्वक सम्पन्न भएको मुल आयोजक समितिले जनाएको छ । महायज्ञको सम्पूर्ण आय व्ययको बिस्तृत विवरण जेठ ३ गते शनिबार सार्वजनिक सुनुवाई मार्फत जानकारी गराईने तथा सोहि दिनबाट कलश वितरण कार्य सुरु गरिने मुल आयोजक समितिले जनाएको छ ।