मंगलसेन ३ कुटीमा सञ्चालित शिवपुराण महायज्ञको सार्वजनिक सुनुवाई

मंगलसेन नगरपालिका ३ कुटीमा बैशाख १९ देखि २९ गतेसम्म सञ्चालित शिव महापुराण ज्ञान महायज्ञको सम्पूर्ण आय व्ययको सार्वजनिक सुनुवाई गरिएको छ । महायज्ञ मुल आयोजक समितिले सरोकारवाला र पत्रकारहरुको उपस्थितिमा महाँयज्ञको सम्पूर्ण आम्दानी र खर्चको विवरण सार्वजनिक गरिएको हो ।

मुल आयोजक समिति अध्यक्ष तथा शिवालय संरक्षण समितिका अध्यक्ष तेज बहादुर बिष्टको अध्यक्षतामा भएको सार्वजनिक सुनुवाईमा आर्थिक उपसमिति संयोजक बृकेश सिंह बोगटीले महायज्ञमा कुल ३१ लाख ७२ हजार ३ सय १४ रुपैयाँको आय तथा व्ययको विवरण सार्वजनिक गर्नुभएको थियो । जसमध्ये नगद संकलन १५ लाख ७१ हजार १ सय ९२ भएको तथा ५ लाख २९ हजार उठन बाँकी रहेको जनाईएको छ । यस्तै खर्च तर्फ जम्मा ११ लाख १८ हजार ६ सय ८८ यज्ञ सञ्चालन खर्च र ३ लाख ५३ हजार ७ सय ९२ रुपैयाँ ध्वनी घर निर्माणमा खर्च भएको छ । हाल मुल आयोजक समिति संग ९८ हजार ७ सय १२ रुपैयाँ बचत रहेको जनाईएको छ ।

महाँयज्ञमा १० लाख ७२ हजार २ सय २२ रुपैयाँ बराबरको भौतिक संरचनाहरु निर्माणका लागि बिभिन्न व्यक्तिहरुले प्रतिवद्धता गरिएकोमा कतिपय निर्माण सम्पन्न भैसकेको र कतिपय प्रक्रियामा रहेको जानकारी दिईएको छ । शिवालय परिसरमा नन्दि निर्माण, हवन कुण्ड निर्माण, ध्वनी घर निर्माण, शिवालय पुग्ने सडक र मैदान निर्माण कार्य सम्पन्न भैसकेको छ । यस्तै शिवालय परिसरमा भैरब मन्दिर निर्माण कार्य दाता मार्फत नै केही समयमै सुरु हुने जनाईएको छ ।

अछाम जिल्लामै पहिलो पटक आयोजना गरिएको ११ दिवसिय शिव महापुराण ज्ञान महायज्ञ मार्फत नर्मदेश्वर शिवालय क्षेत्रको धार्मीक र ऐतिहासिक महत्वबारे जानकारी तथा प्रचारप्रसार भएको आयोजकको दावी छ । यस्तै शिवालय क्षेत्रको विकासका लागि भौतिक संरचना निर्माण लगायतका कार्यमा टेवा पुगेको र सम्वन्धित सरोकारवालाहरुको ध्याँनाकर्षण समेत भएको जनाईएको छ ।

सार्वजनिक सुनुवाई कार्यक्रममा मुल आयोजक समितिका पदाधिकारी सहित जनप्रतिनिधिहरु, पत्रकार र सरोकारवालाहरुको उपस्थिति रहेको थियो  । पत्रकार महाँसंघका उपाध्यक्ष टेक बहादुर थापा, ध्रुव बिसी  र चन्द्र बहादुर थापा लगायत सरोकारवालाको सहभागीता रहेको सार्वजनिक सुनुवाई कार्यक्रमको सञ्चालन मुल आयोजक समिति सचिव कर्ण बहादुर धामीले गर्नुभएको थियो ।