अछाम ४ असोज ।
१४ औं महाँदिवेशन नजिकिदै गर्दा नेपाली काँग्रेस अछामका नेताहरुको पनि बिभिन्न पदमा उम्मेद्वारी घोषणा गर्ने क्रमले तिब्रता पाएको छ । पार्टी कार्यालय मंगलसेनमा पत्रकार सम्मेलन गरि ५ जना नेताहरुले बिभिन्न पदमा उम्मेद्वारी घोषणा गरेका छन ।
पत्रकार सम्मेलन गरि उम्मेद्वारी घोषणा गर्ने नेताहरुमा तरुण दल अछामका अध्यक्ष प्रकाश साउद, क्षेत्र नम्वर २ का क्षेत्रीय सचिव टंक बहादुर धामी, नेता पुष्पराज अधिकारी, झपट रावल र पदम थ्यायत रहेका छन । साउँदले जिल्ला सचिवमा, धामीले क्षेत्रीय सभापति, अधिकारीले महादिवेशन प्रतिनिधि, थ्यायतले क्षेत्रीय सचिव र रावलले मंगलसेन नगर कार्यसमिति सभापतिमा उम्मेद्वारी घोषणा गरेका हुन ।
पत्रकार सम्मेलनमा उम्मेद्वारी घोषणा गर्दै वर्तमान क्षेत्रीय सचिव समेत रहेका नेता टंक धामीले मेरो काँग्रेस नभई सबैको काङ्ग्रेस बनाउने आफ्नो लक्ष रहेको बताउनुभयो । अनुशासित, विधि, र पद्दतिमा काङ्ग्रेसलाई अघि बढाउने संकल्पका साथ आफुले क्षेत्रीय सभापतिमा उम्मेद्वारी घोषणा गरेको उहाँले वताउनुभयो । “व्यवस्थापकीय जिम्मेवारी फस्ट मेनको हुन्छ,” नेता धामीले भने- “म फस्ट मेन नहुँदा सोचेजस्तो काम गर्न सकिएन, पार्टीलाई सुदृढ र विधान सम्मत अघि बढाएर जनताको प्रिय पार्टी बनाउने मेरो योजना छ ।”
जिल्ला सचिव पदमा उम्मेद्वारी घोषणा गरेका तरुण दल अछामका अध्यो प्रकाश साउदले आफु २०४६ सालमा किशोरावस्था देखी निरन्तर पार्टीमा सक्रिय रहेको उल्लेख गर्नुभयो । आफु जिल्ला सचिवमा निर्वाचित भएमा पार्टीको एकपक्षीय परिपाटीलाई चिरेर जनपक्षीय बनाउने बताउनुभयो । नेताले कार्यकर्ताको नोकरको रुपमा काम गर्नुपर्ने भन्दै साउदले काँग्रेस कार्यकर्ताको मुलप्रवाह भएर आफु अघि बढ्ने दृढता व्यक्त गर्नुभयो ।
पत्रकार सम्मेलनमा क्षेत्रीय सचिवको लागि आफ्नो उम्मेद्वारी घोषणा गर्दै नेता पदम थ्यायतले काँग्रेसलाई चलायमान बनाउन र उच्च गति दिन युवाहरु नेतृत्वमा आउनुपर्ने बताउनुभयो । काँग्रेस नेता कार्यकर्ता, क्षेत्रीय प्रतिनिधि र सुभेच्छुकको सल्लाह अनुसार आफुले क्षेत्रीय सचिवमा उम्मेद्वारी घोषणा गरेको बताउँदै उहाँले आफु निर्वाचित हुनेमा विश्वस्त रहेको उल्लेख गर्नुभयो ।
यस्तै महाँदिवेशन प्रतिनिधिमा उम्मेद्वारी गर्नुभएका नेता पुष्पराज अधिकारीले आफुले लामो समयदेखी पार्टीको बिभिन्न भूमिकामा रहेर काम गरिसकेको भन्दै अव महाँदिवेशन प्रतिनिधिका रुपमा जान चाहेकोले उम्मेद्वारी घोषणा गरेको उल्लेख गर्नुभयो ।
मंगलसेन नगरपालिका कार्यसमितिको सभापतिका लागि उम्मेद्वारी घोषणा गर्नुभएका नेता झपट बहादुर रावलले नगरमा आफुले गर्न बाँकी रहेका अधुरा कार्य सम्पन्न गर्नका लागि उम्मेद्वारी घोषणा गरेको बताउनुभयो ।
उम्मेद्वारी घोषणाका लागि आयोजित पत्रकार सम्मेलनमा काँग्रेस नेता चन्द्रप्रसाद ढुंगाना सहित अन्य नेता कार्यकर्ताहरु र पत्रकारको सहभागिता थियो ।
